Выберите шрифт Arial Times New Roman
Интервал между буквами (Кернинг): Стандартный Средний Большой
Культура /
Мыгъэ Тэхъутэмыкъое районым ыныбжь илъэс 95-рэ зэрэхъурэм фэгъэхьыгъэ Iофтхьэбзэ дахэхэр лъэпкъ мэкъэмэ Iэмэ-псымэхэм къязгъаIорэ купэу, «Народнэ» цIэ лъапIэр зыхьырэ «Уджым» (купым ипащэр Адыгеим изаслуженнэ артистэу Къэлэкъутэкъо Инвер) тиреспубликэ ичылабэхэм ащырегъэкIокIы. БэмышIэу пчыхьэзэхахьэ гохь къуаджэу Еджэркъуае дэт Культурэм иунэ щыригъэкIо-кIыгъ. ИкIыгъэ гъубджым чэзыур къанэсыгъ къуаджэу Блащэпсынэ щыпсэухэрэм. ЗыцIэ къэзгъэшъыпкъэжьырэ купым имэкъамэхэмкIэ цIыфхэр зэрэзэкъуиубытагъэр янэрылъэ-гъугъ тиIофышIэхэми.
Сыд фэдэ Iофтхьабзэ Блащэпсынэ дэт культурэм иунэ щызэхамыщагъэми, цIыфхэр ягуапэу ащ къеблагъэх. Ау мызэгъэгум адыгэ лъэпкъ мэкъамэхэр шIу зылъэгъоу къекIолIэгъагъэхэм япчъагъэ умыгъэшIэгъон плъэкIыщтэп. Зыныбжь хэкIотэ-гъэ нэнэжъхэм япхъорэлъф-къорэлъфыхэр ягъусэжьхэу пчыхьэзэхахьэм къеблэгъагъэ къодыехэп - купым къадэкIогъэ орэдыIохэу ХьакIэцIыкIу Мае, Ацумыжъ Адам, КIакIыхъу Нухьэ (Тэхъутэмыкъуае Культурэм иунэу дэтым иIофышIэхэм) орэдхэр къадаIоными зыщадзыя-гъэп.
ЗэлъашIэрэ адыгэ пщынаоу Лъэцэрыкъо Кимэ ыугъоижьыгъэ «ижъырэ адыгэ мэкъамэхэм» зэхахьэр къызэIуахыгъ. Нэужым, адыгэ тхакIохэм атхыгъэ усэхэу, тикомпозитор цIэрыIоу Тхьабысымэ Умарэ ишIуагъэкIэ орэд хъужьыгъэхэм залым зыкъыщаIэтыгъ. Лэщэпсынэ культурэм иунэ зыцIэ ыхьырэ Сихъу Рэмэзани иIэдэкъэчIэкIхэм ащаухьагъэп хьакIэхэм.
Пщынэм, сырынэм, Iэпэпщы-нэм, шыкIэпщынэм, шъонтыры-пIэм ямэкъэмэ дахэхэр едэIугъэ пстэуми агу нэмысыгъэу пIон плъэкIыщтэп. Купым хэт орэдыIо-хэми алъэкI къагъэнагъэп. Ясэнаущыгъэ ипэгъокIэу Iэгутео макъэм залым зэп зыкъызэрэ-щиIэтыгъэр. ГущыIэ фабэхэр хьакIэхэм апигъохыгъ клубым ипащэу Отрэщ Симэ.
КIэухым купым ыцIэкIэ АР-м, Пшызэ шъолъырым ыкIи Урысые Федерацием культурэмкIэ изаслуженнэ IофышIэу, Сихъу Рэмэзан иныбджэгъущтыгъэу КIыргъ Юрэ зэхахьэм къеблэгъагъэхэм закъыфигъэзагъ:
- Непэ тыкъызэблэгъэгъэ къуаджэр – тиунэ фэдэу тэлъытэ. Ар тэзыгъаIорэр шъукъызэрэтпэгъо-кIыгъэ шIыкIэмрэ дахэу тфэшъуIуагъэмрэ. Тэ тшъхьэкIэ лъэшэу тигуап Сихъу Рэмэзан ыцIэ зэрэжъугъэлъапIэрэми, тиадыгэ орэдыжъхэми осэшхо зэрафэшъушIырэми. Тэгугъэ, тизэIукIэхэр нахьыбэ хъунхэу, тимэкъамэхэри нахь бэрэ Iунхэу!
Купым хабзэ зэрэфэхъугъэу, пчыхьэзэхахьэр «удж»-кIэ зэфа-шIыжьыгъ.
Сихъу СултIан.