Выберите шрифт Arial Times New Roman
Интервал между буквами (Кернинг): Стандартный Средний Большой
Образование /
Ары бэмышIэу Кощхьэблэ тхылъеджапIэм илитературнэ хьакIэщ щыкIогъэ Iофтхьабзэм цIэу иIагъэр. Адыгэ прозэм илъэгъохэщэу, адыгэмэ ящыIэкIэ–псэукIэ къэзыIотэгъэ тхэкIо цIэрыIоу КIэрэщэ Тембот мыгъэ илъэсишъэрэ тIокIырэ зэрэхъурэм ар фэгъэхьыгъагъ. ЗэIукIэм хэлэжьагъэх тхылъеджапIэм щылажьэхэрэмрэ тхылъеджэхэмрэ. Iофтхьабзэр зэрищагъ еджапIэм иIофышIэу Хьэсэнэ Рузанэ.
ЗэIукIэм КIэрэщэ Тембот ищыIэныгъэ ыкIи итворческэ гъогу щытегущыIагъэх, лIыхъужъэу, ипроизведениехэм къащитыгъэхэр, тхылъеджэхэм агу къагъэкIыжьыгъ.
Шъхьафэу тхэкIошхом ишIэжь мыкIосэнымкIэ Iофыгъоу тиреспублики тирайони ащызэшIуахыхэрэм тегущыIагъэх. ГущыIэм фэшI, къалэу Мыекъуапэ КIэрэщэ Тембот имузей ар квартирэу зыщыпсэущтыгъэм чIэт. ТхакIом ыцIэ ахьы республикэм иурамыбэмэ. КIэрэщэ Тембот исаугъэт Мыекъуапи дэт, Кощхьэблэ парк гупчэми ит. Илъэс къэс Кощхьаблэ районым щыщ студент анахь дэгъухэм КIэращэм ыцIэ зыхьырэ стипендиер афагъэшъуашэ.
КIэухым кIэлэеджакIохэр документальнэ фильм тхакIом фэгъэхьыгъэу еплъыгъэх, тхылъеджапIэм ыгъэхьазырыгъэ къэгъэлъэгъонэу «Аксакал адыгейской прозы» зыфиIорэм нэIуасэ фэхъугъэх.