Выберите шрифт Arial Times New Roman
Интервал между буквами (Кернинг): Стандартный Средний Большой
Все новости /
Хабзэ зэрэхъугъэу, адыгабзэм и Мафэ фэгъэхьыгъэ зэнэкъокъу тирайон щырекIокIыгъ. Ащ хэлэжьагъэх я 5-11-рэ классхэм якIэлэеджакIохэу ныдэлъфыбзэр шIу зэлъэгъоу, ащ илъыгъэкIотэн фэбанэхэрэр ары. Къыхэгъэщыгъэн фаер, зэнэкъокъум хэлэжьэгъэ пстэуми угукIэ уагъатхъэу уядэIунэу зэрэщытыгъэр ары, анахь дэгъури къахэпхынэу къиныгъэ. Ары нахь мышIэми, анахь дэгъухэр ушэтэкIо купым ыгъэнэфагъэх. Гъэсэныгъэм, шIэныгъэм, культурэм, гъэзетым яIофышIэхэр Фэдз къыщегъэжьагъэу ХьакIэмзые нэсыжьэу а ушэтэкIо купым хэхьагъэх.
КIэлэеджакIохэм ягъэшIожьын фэгъэхьыгъэ Iофтхьабзэ кIэлэцIыкI модельнэ тхылъеджапIэм джырэблагъэ щырекIокIыгъ. ТекIоныгъэ къыдэзыхыгъэхэм текIоныгъэ тхылъхэмрэ шIухьафтынхэмрэ гъэсэныгъэмкIэ Кощхьаблэ районым игъэIорышIапIэ ипащэу Бэрзэдж Асят аритыжьыгъэх.
Нахьыжъ купымкIэ (я 9-11-рэ классхэр) апэрэ чIыпIэр къыдэзыхыгъэр ХьакIэмзые гурыт еджапIэм икIэлэеджакIоу ХьакIэмыз Заир. Заирэ республикэм щызэлъашIэрэ кIэлэегъаджэу ХьакIэмыз Нинэ Зулэ ыпхъум икъорылъф ыкIи янэжъ цIэрыIо къыгъэукIытэжьыгъэп! ЯтIонэрэ чIыпIэр ушэтэкIо купым зыфигъэшъошагъэр Тутарыщ Диан (ХьакIэмзые гурыт еджапI), ящэнэрэр - Кощхьаблэ гурыт еджапIэу №1 иеджакIоу Мамхыгъэ Аскэрбый.
НахьыкIэ купымкIэ (я 5-8-рэ классхэр) апэрэ чIыпIэр зэкIэми зэдырагъаштэу ыкIи къылэжьыгъэ шъыпкъэу зыфагъэшъошагъэр Кощхьаблэ гурыт еджапIэу №1 и кIэлэеджакIоу Ешэкъо Нафис. Къыхэгъэщын фаер, Нафисэ мыр иапэрэ текIоныгъэп. Мы пшъэшъэжъыем иныдэлъфыбзэ зэригъэжъынчырэр зэрэреспубликэу зэлъашIэ пIоми ухэукъощтэп, текIоныгъэхэр зэнэкъокъу зэфэшъхьафхэм ренэу къащыдехы. ЯтIонэрэ чIыпIэр ыхьыгъ Кощхьаблэ гурыт еджапIэу №2 икIэлэеджакIоу Дзэсэжъ Джамал. ХьакIэмзые гурыт еджапIэм икIэлэеджакIоу Джэгур Лиза ящэнэрэ чIыпIэр къыдихыгъ.
Мыхэмэ анэмыкIэу мэкъэтынымкIи анахь дэгъухэр агъэнэфагъэх. Ахэр Блэшэпсынэ ипшъэшъэ гъэшIуагъэу Быикъо Самирэрэ ХьакIэмзые щыщэу Тутарыщ Джэмалрэ.
Мыщ фэдэ сабый шIагъохэм тыбзэ агъэжъынчэу зэрэтиIэхэмкIэ тарэгушхо! Мы Iофтхьабзэм дэгъум анахь дэгъухэр зэрэхэлэжьагъэхэр тшIошъ мэхъу! Аллахьэм къытфеухъумэх ыкIи тфегъэбагъох ащ фэдэ ныбжьыкIэхэр!